Tao rana do karawan (II)

 

8. Ano makaranes rana ori do vahay no mangdes ori am, somhyked pa so alikhy a kasdep na rana do vahay, no manireng am, kamiyan do da mo kaminan kwan na, no mamizing no tao do sahad no vahay am, makobot a tomita siya, to mangtokto do ned na, sino o ya manci niyaken do madagdag oya a ya ji yangay do pakavosen da oya kwan na, to na vinivina do oned na do ipicicingi na tomita siya do sesdepan, tomangnaknakem o tao ori, manireng am, apiya no yamiyan sikaminan am, apiya ori ciyabo kwan na do oned na, beken do mabneken a mikala so ilhylamnay no nakem a maphysira so oned.

9. Micicingi o tao do vahay ori am, akmi niramonan o tao ori a makacita siya, ta kapa yo kan na ori do ka piya no raralayan da niya, o poboten na cireng no nang am, beken do maharek a kasomzan a palanginan a mapaovay so tao so oned, icyama na iomvoyog a ranom no metaw a cireng na siya, no manireng am, kaminan kong, ko mai jiya ta kwan na nina na niyapo mo am, sino zipos ta no ji ya sikaminan ta kwan na am, ori ko tonolaoi do vahay ta.

10. Macita na ori no kaminan da ori am, akmi pinezakan o oned na no nang, manireng am, asdep jito kapanmama mo pa, kwan na no tao a ori, tovisan na nang am, nohon, kwan na, kasdep na rana, o nipalolo na ori o gaod kano avowa ori am, patodaen na rana do karhys no mavakes na ori, o nakenakem na no meakay na ori am, beken a kaoyohoyo no nakem no meakay na ori. Thyka rana manmama ori am, sirsirengen na rana o kaminan da ori, manireng am, mangay ko rana kwan na, kangay na rana no nang do vahay da, beken a kato miyoyoyawan ta amiyan so ipipangay a vazay do akman so sang, am ori an icyami mangonong do karaprapesan a mao o phyphypangayan no aktokto no onhd, ji topikamolaya mabneken a metaw a cireng no ji yaminhyrarake a tao.

11. Ano mashyrem rana ori am, mangay rana o nipamnekan da karyos no mavakes na ori, mangap so palololohon na rararay na ipangan, makasasnad do vahay da ori am, topamiwalam do inaorod no vahay da, mapawaw so kadkadyangay, ji yatomicicidna o somdep do vahay to pacilolowan da o katotao no vangvangkas ikaraet no tanodan so inawan a karyos ori, ami kangorasan no ngae am, somdep rana do vahay o mananod so inawan a karyos ori, sira rana ori am, kasashyrem na rana am, mapidokdok sira ori so apoi, a ipamozowao so vangvangkas, ano mangano da no vangkas o malaohop am, no manireng sira am, ji tamo andep ta ya miyan so tao kwan da am, ori o ji da makasngeni do dang, minacikalapo a no kakwa pa tonginanginapa do karawan.

12. O meakay na no mavakes ori am, pasosonen na no mavakes na ori manangdang so aneng kapanangdang na rana no meakay na ori so aneng do tataoi, macinao ori no mazidangdang ori do isdep na no karis na ori, somdep rana o karis na ori am, toro da jiya o aneng do tataoi, kapapzopzot na so lima na do velek no karis na ori, katoyotoyon na siya, no manireng am, ko imo adesen a akman siya am akma ka pineigegen a avang so kataotao a ji misiniwaz a ka piya mo no kataotao kwan na, ano thyka na rana ori am, paimowain na rana o soso na, akman so sang ta toyotoyonen na ori ano thyka na rana ori am, payapohon na rana do lima no karis na ori o adesen na kato na paloslosan siya do katotao na mangay mangavosan do aiai na, kapa vyovyot na siya so maramararaet no katotao na a ji miparek so katotao.

 

arrow
arrow
    全站熱搜

    siyapenjipeaya 發表在 痞客邦 留言(0) 人氣()